باترون مكتوب لطاقية تريكو سهلة

بسم الله الرحمن الرحيم

السلام عليكم ورحمة الله وبركاته

أهلا بحضراتكم

النهاردة ان شاء الله جايبلكم باترون مترجم لطاقية تريكو سهلة جدا ممكن المبتدئين يعملوها

ممكن تستعملي ألوان جانجاه في الطاقية دي شكلها هيكون أحلي بكتير من السادة

الباترون متوفر فيه مقاسين والمقاسين لشخص بالغ واحد فيهم مقاس عادي والتاني مقاس أكبر منه شوية ...في رأيي المقاسين قريببن من بعض أوي مفيش فرق كبير ما بينهم 

الترجمة للباترون ترجمة حرفية لكن بالنسبة للملاحظات أو تعليقي علي الباترون أو كيفية تعديل المقاس بحيث يناسب الأعمار المختلفة بعد ما يخلص شرح الباترون

الباترون :
الأدوات المستخدمة :
خيط مقاس 4 ( مقاس وسط )
ابرة تريكو مدببة من ناحية واحدة مقاس 5 مم
ابرة تنظيف أو ابرة ايتامين

التعليمات في الباترون لمقاس بالغ صغير والتغييرات للمقاس الكبير ستكون بين الأقواس

مقاس الطاقية :
محيط المقاس الصغير : 48 سم 
محيط المقاس الكبير :53.5 سم

الطاقية :
1- ابني غرز علي الابر 72 غرزة (المقاس الكبير 80 غرزة )

2_الصف الأول :
غرزة أمامية ثم غرزة خلفية و كرري الي نهاية الدور بنفس الترتيب حتي تصل طول القطعة الي 5 سم

3_الصف التالي ( صف الزيادة ويجب أن تكون القطعة علي الوجه الصحيح ):
اصنعي 9 غرز أمامية ( المقاس الكبير 10 غرز أمامية ) ثم قومي بعمل زيادة M1 ( غرزة واحدة زائدة )
* اصنعي 18 غرزة أمامية ( للمقاس الكبير 20 غرزة أمامية ) ثم زيادة في الغرزة التالية M1 **
كرري من العلامة * الي العلامة ** 3 مرات ثم اصنعي 9 غرز أمامية ( للمقاس الكبير10 غرز أمامية )
76 غرزة ( المقاس الكبير 84 غرزة )

4_الصفوف التالية :
الوجه الصحيح : الدور كله غرز أمامية
الوجه الخاطئ : الدور كله غرز خلفية
حتي تصل طول القطعة الي 23 سم ( المقاس الكبير 25.5 سم )
انتهي بدور علي الوجه الخاطئ ليكون الدور التالي علي الوجه الصحيح

5_الصف التالي ( صف تنقيص ويجب أن تكون القطعة علي  الوجه الصحيح ) :
*2 غرزة أمامية معا ( تنقيص ) **
كرري من * الي ** حتي نهاية الصف 
38 غرزة ( المقاس الكبير 42 غرزة )

6_اقطعي الخيط تاركة ذيل ما يقارب 45.5 سم من الخيط
و باستخدام ابرة التنظيف اخرجي الغرز من ابرة التريكو وبعد اخراج كل الغرز شدي القطعة جيدا و أغلقي الدائرة المتكونة ثم اقطعي الخيط

7_قومي بخياطة جانبي الطاقية باستخدام ابرة التنظيف ثم اقطعي الخيط
قومي باخفاء الخيوط

********

* ملاحظات *

كيفية عمل الطاقية لتناسب جميع المقاسات والأعمار:
1_باستخدام أي مقاس خيط وابر تريكومدببة من ناحية واحدة مناسبة للخيط وبمعرفة محيط الرأس للشخص المطلوب أو السن المطلوب قومي ببناء غرز بعد فردها علي الابرة طولها يساوي محيط الرأس أو أقل قليلا بحيث تبدأي بغرزة أمامية وتنتهي بغرزة خلفية
2_أكملي الطاقية بنفس الترتيب الموجود في الباترون مع مراعاة طول الطاقية لكل سن يعني أول جزء بدل ما يكون 5 سم يكون أقل مثلا 3 أو 4 سم علي حسب السن وطول الطاقية وهكذا ( لو عندك طاقية تانية تقيسي عليها ) 

لو تحبي تضيفي كرة بوم بوم علي حسب رغبتك

أتمني تكون الطاقية سهلة عليكم و الباترون كان واضح
أشوفكم علي خير ان شاء الله
و السلام عليكم و رحمة الله و بركاته