الخطوات الأساسية للعناية ببشرة الوجه مع تجربتي

بسم الله الرحمن الرحيم

السلام عليكم و رحمة الله و بركاته

أهلا بحضراتكم في المدونة

الموضوع اليوم عن الخطوات الأساسية للعناية بالوجه

بداية مقدمة بسيطة عن مشواري في العناية ببشرة وجهي

من تقريبا سن 13 أو 14 و أنا بعمل الماسكات الطبيعية لكن بدون معرفة أنا نوع بشرتي ايه أو حتي الماسك اللي بعمله ينفع علي بشرتي و لا لأ و هل اللي بعمله ده صح و لا خطأ

بغض النظر كنت بكره المنتجات التجاربة الخاصة بالبشرة بفكرة انه أكيد الحاجات دي مؤذية للبشرة لكن مش كل المنتجات مضرة غير انه الصابون أكتر حاجة مؤذية للبشرة واحنا بنستعمله علطول

من حوالي سنة بدأت اتفرج علي فيديوهات علي اليوتيوب لقنوات أجنبية و قنوات كورية ناطقة باللغة الإنجليزية و استفدت كتير من القنوات دي خاصة القنوات الكورية لأنهم بيهتموا ببشرتهم جدا و بطريقة علمية صحيحة لاهتمامهم بزيارة أطباء الجلدية

المهم بدأت أفهم الخطوات الأساسية للعناية ببشرة الوجه

و في الموضوع هنا هتكلم عن تجربتي الشخصية خلال العام الماضي بالتالي معظم المستحضرات اللي هقولكم عليها هي مناسبة لنوع بشرتي

ملاحظات قبل قراءة الموضوع :
في حالة وجود حبوب كتير علي الوجه يرجي استشارة طبيب جلدية قبل استعمال أي مستحضر تجميلي أو طبي للوجه
المستحضرات المذكورة مناسبة للبشرة المختلطة
في أوقات الشتاء البشرة بتكون جافة حتي لو نوع بشرتك عادية أو مختلطة بمعني انه البشرة أحوالها بتختلف علي حسب حالة الجو وكمان هرمونات الجسم بتأثر علي البشرة
قراءة مكونات المستحضر كويس جدا قبل استعماله لتجنب الحساسية

نوع بشرتي مختلطة و في الشتاء بتكون جافة و في أوقات بتظهر حبوب خاصة مع الأكل المالح أو الحار أو قبل وقت الحيض

الخطوة الأولي :

تنظيف الوجه باستخدام الغسول:

من سنة لم أستخدم الصابون اطلاقا الا مرة واحدة و وجهي نشف جدا فيها
استعملي فوطة رقيقة علي البشرة ونشفي كأنك بطبطبي علي طفل صغير

في رأيي الشخصي استعمال الغسول أفضل من الصابون
اختاري الغسول المناسب لبشرتك من ضمن الأنواع المتاحة ليكي و السعر المناسب
دي الأنواع اللي استعملتها :

الغسول ده من فيس شوب
سعره 25 ريال سعودي
مناسب لجميع أنواع البشرة
وهو حجمه كبير هيفضل معاكي فترة طويلة
فيه منه أنواع تانية مناسبة للبشرة الجافة و الحساسة و روايحهم جميلة أوي و دي أكتر حاجة بتعجبني في المنتجات الكورية

غسول نيفيا للبشرة الجافة و الحساسة
للأمانة لسه مجربتوش
سعره 25 ريال

غسول اسكينول بالبابايا
باستخدام قطنة وتمسحي علي منطقة الوجه و الرقبة
نوع كويس جدا و رخيص كمان
سعره 7 ريال سعودي
عيبوبه في رأيي الشخصي أولا ريحته مش حلوة و ثانيا انه مفعوله لا يقارن بأنواع الغسول الأخرى

طبعا فيه أنواع تانية كتير من الغسول المناسبة لنوع بشرتك و أنواع ممتازة جدا لكن سعرها بيكون غالي جدا جدا

الخطوة الأهم من الغسول هي طريقة التنظيف نفسها
و الخطوة دي هي اللي فرقت معايا و متأكده مليون في المية انها هتفرق معاكي كمان

الطريقة الأولي :
باستخدام اصبعي السبابة و الوسطي في حركات دائرية في اتجاه عقارب الساعة و بعدين في عكس اتجاه عقارب الساعة
و ممكن استخدام اصبع البنصر لضغط أقل
فكرة غير صحيحة تماما استخدام حركة تقيلة بتنظف البشرة أكتر
العكس صحيح : استخدمي حركات خفيفة و رقيقة و عاملي بشرتك كأنك بتعاملي بشرة طفل و بشرتك هتنعم أكتر و دي من تجربتي الشخصية
الحك الجامد نتيجته مش كويسة علي الجلد

الطريقة الثانية :
اسفنجة التنظيف اليدوية :
دي استخدمتها لمدة سنة و نتيجتها تحفة لأنها فعلا بتنظف الوجه من التراب و الافرازات الدهنية و بتساعد جدا علي التخلص من الرؤوس السوداء

الاسفنجة دي من فيس شوب
سعرها 10 ريال
الاسفنجة دي طرية وناعمة جدا علي البشرة و دي الاسفنجة اللي استعملتها في خلال السنة اللي فاتت
و لما بتنشف من الماء بتلاقيها جمدت كل اللي تعمليها انك تبليها بالماية وتبقه طرية تاني

الاسفنجة دي برده من ذا فيس شوب
سعرها 20 ريال
نفس الطريقة بتكون طرية لما تتبل بالماية و تجمد لما تتصفا من الماية
استعملتها فترة قصيرة لكن محبتهاش أوي لأن مش بقدر أتجكم فيها  زي الاسفنجة التانية غير انها خشنة أكتر من الاسفنجة الأولي
طريقة استعمال الاسفنجة الأولي أو الثانية بتبلي الاسفنجة بمياه فاترة و تغسلي وجهك برده بالماء الفاتر و بعدين تحطي علي وجهك أو علي الاسفنجة الغسول أو الصابون و تستخدمي الاسفنجة في حركات دائرية في اتجاه عقارب الساعة ثم في عكس اتجاه عقارب الساعة

الطريقة الثالثة :

استخدام أجهزة تنظيف الوجه

و الأجهزة دي فعلا ليها مفعول كويس جدا لأنها بتنظف البشرة كويس جدا لدرجة انك هتحسي ان وشك متصنفر بعد ما تستعمليها

فيه أنواع كتير منها بس أنا جربت نوع واحد بس منهم

 

جهاز أولاي ديجينيريست لتنظيف الوجه

سعره تقريبا 119 ريال و بيكون أرخص من كده في أوقات العروض

استخدمته من حوالي أسبوعين و نتيجته حلوة أوي وده اللي بستخدمه حاليا مع الغسول

طريقة الاستعمال موضحة في الفيديو
لو مش بتحبي تستعملي غسول أو شايفاه غالي استعملي صابون يكون فيه مواد طبيعية أكتر و استعملي معاه اسفنجة التنظيف لنتيجة أحسن

الخطوة الثانية :

المقشر:

المقشر تستعملية حوالي كل أسبوعين أو 3 أسابيع أو 4 أسابيع علي حسب بشرتك و لو عندك حبوب كتير بلاش تستعمليه الا كل شهر و نصف أو كل شهرين مرة و طبعا تسألي دكتور الجلدية لو بتتابعي معاه

دي الأنواع اللي استعملتها السنة اللي فاتت :

المقشر ده تقريبا ب 18 أو 19 ريال أنا اشتريته من سنة بالظبط و مش بصراحة
المقشر ده يعتبر كويس ومش بينشف البشرة أوي
استعلمت أنواع تانية زمان كانت أحسن من ده لكن مش فاكرة اسمها 
يعني شوفي النوع اللي تحبيه و استعمليه
النوع ده مناسب للوجه و الجسم

المقشر ده نوعه معروف و كويس جدا لكن اللي في الصورة ده بينشف الجلد جدا جدا
مستعملتوش الا مرة واحدة

المقشرات الطبيعية خيار كويس جدا 
استعملت الشاي الأخضر كمقشر و ممتاز جدا 
كمان القهوة
زيت الزيتون مع السكر من المقشرات اللي استعملتها كتير لكن للأيدي و الأرجل فقط لأن زيت الزيتون بيزيد من نمو الشعر وبيجعله أسود

الخطوة الثالثة :

التونر  Toner

التونر هي الخطوة الثالثة في العناية الأساسية بالبشرة

التونر ليه وظايف مختلفة ممكن يكون مرطب أو بيمنع الحبوب من الظهور لكنه مهم جدا لأنه بيساعد البشرة انها تكون طبيعية

و دي الأنواع اللي استعملتها في السنة الفائتة :

تونر نيفيا للبشرة الجافة والحساسة

سعره 25 ريال

حجمه مناسب لكن للأسف بيستهلك بسرعة لأنه سائل جدا

طريقة استعماله بتحطي شوية علي قطنة وتمرريه علي بشرتك

التونر ده كان السبب اللي خلاني ابحث علي النت علي الطريقة المناسبة للعناية بالبشرة و كان الوحيد اللي استعملته قبل ما اعرف الغسول و غيره علشان مكنتش عايزة أرميه و صلاحته تنتهي فقررت اني أستعمله و بعد فترة لاحطت انه الحبوب اللي كانت بتظهر لي في العادة اختفت تماما حتي قبل معاد الدورة الشهرية

و دي ميزة التونر ده مناسب جدا للبشرة الحساسة

التونر ده من فيس شوب من مجموعة الأرز و هو بيتباع لوحده أو مع مجموعة الأرز دي

اشتريت التونر ده في فترة الشتاء

التونر لوحده سعره 35 ريال
المجموعة سعرها 95 ريال
التونر ده حبيته جدا لأن ريحته خفيفة وجميلة وكمان تونر مرطب ومناسب لوقت الشتاء
كان دايما في وقت الشتاء وجهي كان بينشف أوي و بيقشر طول فترة الشتاء و لما استعملت التونر ده الموضوع ده اختفي تماما
التونلر ده مش خفيف زي تونر نيفيا هو سميك شوية و تحسي انه شبه السائل الموجود في الماسكات الكورية
في التعليمات مكتوب انه تستعملي قطنة وبعدين تمسحي علي بشرتك لكن لما استعملت قطنة حسيتها بتشرب التونر كله و بستعمله اني بحط شوية علي صوابعي و تكون ايدك مغسولة كويس طبعا بالصابون وبعدين بحطي علي وجهي في حركات خفيفة
و لأنه كثيف هيفضل معاكي فترة طويلة

الخطوة الرابعة :
الترطيب :
خطوة الترطيب دي مهمة جدا سواءا في الصيف أو الشتاء لأن الترطيب بيغذي البشرة و من الأسباب اللي بتطول في عمر البشرة بوجه عام حتي لو النوع اللي بتستعمليه مش فيه مواد بتساعد علي تقليل التجاعيد و الكلام ده كله
من الحاجات اللي بتعطي ترطيب عالي الزيوت الطبيعية استعملي نوع مناسب لبشرتك لكن ابعدي عن زيت الزيتون لأنه بيتقل شعر الوجه
في خلال السنة اللي فاتت دي استعملت كذا نوع استعملت كريم جونسون مرطب و كريم جرحيز بزبدة الشيا ( زبدة الشيا ترطيبها عالي جدا لكن تقيلة شوية استعملي كمية صغيرة منها أو خفيفيها بالتونر و حاليا بستعمل الكريم ده للأيدي و الأرجل و ممتاز جدا جدا و ممكن تستعملي زبدة الشيا الطبيعية من غير نوع تجاري )
استعملت زيت الزيتون ( ترطيب كويس لكن سود الشعر علي وجهي و وقفته علطول )
استعملت النوع ده
سعره 5 ريال
يعني كويس مش وحش
استعملت مرطب لوريال

سعره 25 ريال
يعني أديله 6 من 10
ليه ؟
صغير جدا و خلص بسرعة أوي
رائحته تشبه رائحة مراهم و كريمات الحساسية و محبتش ريحته خالص

استعملت مرطب الأرز من فيس شوب من مجموعة الأرز

مش بيتباع لوحده
من غير مبالغة أحسن نوع استعملته في حياتي
خفيف علي البشرة و مفعوله ممتاز بعد ما بستعمله قبل النوم مع الخطوات السابقة و أصحي تاني يوم الصبح البشرة بتكون ناعمة جدا و ريحته حلوة أوي و تحسي انه مش مرطب بس لا كأنك استعملتي ماسك من الماسكات دي لو حد استعملها منكم و يعرف 

دي كانت الخطوات الأساسية للعناية بالبشرة و فيه خطوات تانية أكتر زيادة زي الايسنس و الايملشن و حاجات تانية لكنها مش أساسية

ايملشن

ايسينس

في رأيي الشخصي الخطوات دي هتغير بشرة وجهك تماما للأفضل
نفذيها و من غير كسل و لما هتشوفي مفعولها مش هتبطليها أبدا
ميكونش كل اهتمامك علي ماسكات تفتيح البشرة بس و لو اهتميتي ببشرتك مهما كان لونها هتكون نتيجتها بشرة ناعمة و صحية و من غير حبوب

أتمني يكون الموضوع عجبكم
شكرا علي المرور و قراءة الموضوع
أشوفكم علي خير
و السلام عليكم و رحمة الله و بركاته